Hasin pyari bholi
Shahd ke jaisi mithi
Hai naram jaise rui
Nani maa
Kahaniya sunati
Pehliya bujhati
Thapak thapak sulati
Nani maa
Tumhi ho meri lori
Tumhi meri kahani
Tumhara pyar
Bachpan ki ek hasi nishani
Tumhi ne di thi gudiya
Jo thi meri saheli
Tumhara hi tha aangan
Mai kal thi jis me kheli
Tumhi ne tha bataya
Hai rang kitne sare
Tumhi ne tha bataya
Hai phul kitne pyare
Tumhi ne tha sikhaya
Bado se kaise bolu
Tumhi ne tha sikhaya
Dupatta kaise odhu
Wo pyar se bulati
Wo pyar se sikhati
Wo kuch na kuch batati
Nani maa
Tumhi ne mere dil me mohabbate hain gholi
Tumhi se to suni thi
Jo bolti hu boli
Tumhi ne to kaha tha
Jo bhulta nahi hain
Hamesha yaad rakhna ke zindagi hasi hain
Wo har subah jagaati
Mithayiya khilati
Hamesha muskurati
Nani maa
Hasin pyari bholi
Shahd ke jaisi mithi
Hai naram jaise rui
Nani maa
